Low German

Dütt is de Homepage vun de Stormarnschool Ahrensborg

Hartlich willkamen in Ahrensborg, "Hamburgs schöner Nachbarin", as de Lüüd hier seggen doot. De Grootstadt is nich wiet weg: Mit de U- oder de S-Bahn büst in en halve Stünn merrn in Hamborg. Dat is en Vördeel för junge Lüüd, de wat beleven wüllt!

Ahrensborg is en junge Stadt: Eerst in't 20. Johrhunnert un sünnerlich na'n letzten Krieg sünd so veel Lüüd hertrocken, dat de Ort 1949 Stadt worrn is. - Vele Lüüd kaamt na Ahrensborg, wieldat se uns Slott ankieken wüllt: Dat is recht wat oolt, 1595 hett de Graf Peter Rantzau dat buun laten. In de Neegde vun dat Slott gifft dat en nieget Kulturzentrum, den "Marstall". Dor könnt Malers un Bildhauers ehre Warke utstellen un Dichters ehre Texten vördregen.

Ok för junge Lüüd hett de Stadt en nieget Zentrum buut. Dat liggt an'n Stormarnplatz mehrn in de Stadt. Dor kann Musik maakt warrn un een kann sik drapen un klönen. Uns Stadt hett üm un bi 30.000 Inwahners un över tein Scholen. De Stormarnschool is een vun twee Gymnasien. Wi hebbt üm un bi 900 Schölerinnen un Schölers un 65 Schoolmestersche un Schoolmester.

Woans dat bi uns utsehen deit un wat dat Besünnere an unse School is, dat wüllt wi ju op unse Homepage wiesen.

Kiekt ju dat an!

Text: Volker Holm